Matbuat vastaları: Aqyarda Ukraina tarafdarlarını yoq etecek olalar

Aqyarda Ukrainağa qol tutqan sakinlerni yoq etecek olalar.

Bunı «Gromadske radіo» Facebook saifesinde yazdı.

Böyle etip, «Aqyar siyasiy forumında» «Aqyar ukrain teşebbüsçilerniñ» soyadları ve adreslerini yerleştirip, öldüreceklerni bildireler.

Muzakere çirkin sözler qullanuvınen keçirile: «BMTna şikâyet etiñiz, ayvanlar. Biz bütün faşistlerni kömerik».

Berilgen malümatlarğa köre, cedvelde yañı adlar ep peyda ola.

«Mayısnıñ 9-zı yaqınlaşa. Tarihımıznıñ eñ müim künlerinden biri. An*ane olaraq faşistler banderacı ayvanlar ses-şamata köterecek. Lâkin kiçik bir ilâve bar. Bizler Aqyar ve Qırımda yaşağan Pravıy sektor tarafdarları ve milletçilerniñ adres ve telefonlarını qabul etemiz», – dep tekrarlay forum yazılarını «Gromadske radіo». «Gromadske radіo» yerli «akimiyetke» muracaatta bulunıp, uquq qoruyıcı organlarnıñ vekillerini buña diqqat ayırıp, zorbalıqqa yol bermemege çağıra.


«Çalıy (istifağa çıqqan «halq gübernatorı» – muarrir), Aksönov (Qırım «baş naziri» – muarrir), Poklonskaya (Qırım prokurorı – muarrir) – siz bunı yapa bilesiñiz! Medvedçuk, Tsaröv, Simonenko, Ravreba, Verşinin, Şariy, Körnilov, Çalenko, Berdnik – sizni bu forumda diñleycekler! Rusiye jurnalistleri – Olşanskiy, Azar, Kaşin, Dm. Kiselöv! Pravoslav kilsesi! Kör quturuvğa baqqanda adalet ve insaniyet qıymetini bilgen insanlar – yaqınlaşqan facianı toqtatıñız! Adamlarnıñ ömürlerini saqlañız. İnsan qıyafetini coymañız», – dep yaza matbuat vastası.