Link açıqlığı

Türkiye tış işler Nazirligi Qırımda Mecliske qarşı areketlerden sebep vaziyet kerginleşeceginden qorqa


Türkiye tış işler Nazirligi Rusiyeniñ qırımtatar halqınıñ lideri Mustafa Cemilevge Qırımğa kelmek yasağını takbih etti, dep bildire BBC-Ukraina.

«Bunıñ bir sebebi ve izaatı yoq. Bizler böyle bir cezanı qabul etip olamamız, daa doğrusı – onı takbih etemiz», – denile nazirlikniñ resmiy beyanatında.

Türkiye tış işler Nazirligi bildirdi ki, Meclis reisi Refat Çubarov ve mayıs 3-de Cemilevni «demokratik ve barışıq alda» qarşılağan diger qırımtatarlarnı qorquzuv areketleriniñ aqibetleri fena olması mümkün.

Vesiqada qayd etilgeni kibi, Meclis «qırımtatarlarnıñ yekâne temsil organı» olıp, qıyınlıqlarğa baqmadan bütün problemlerni demokratik usullardan faydalanıp al etti. Türkiye tış işler Nazirliginiñ fikirince, aynı bu sebepten «Mecliske qarşı er angi areketler regiondaki vaziyetni kerginleştire ve ciddiy bir aqibetlerge ketirmesi mümkün».

Türkiye Meclis Ukraina Yuqarı Radası tarafından resmiy şekilde tanılğanını hatırlattı.

«Sizlerden (meraqlanğan taraflardan, – muarrir) qırımtatar halqınıñ demokratik aq-uquqları ve onıñ yekâne temsil organına sayğı köstermeñizni bekleymiz», – aytıla vesiqada.

Qırımtatarlarnıñ Mustafa Cemilevni Qırımğa kirsetmegenlerine qarşı narazılıq aktsiyalarından soñ, Qırım «prokurorı» Natalya Poklonskaya Meclis reisi Refat Çubarovnı «ekstremizm faaliyetini yasaq etüv» aqqında tenbiyeledi ve, buña qulaq asılmasa, Meclis yoq etilecek ve onıñ faaliyeti yasaq etilecegini bildirdi.

Bundan soñra Cemilev Meclis faaliyeti yasaq etilse ve onıñ reberleri apske alınsa, Qırımtatar Milliy Meclisi gizli çalışacağını ayttı.

Tünevin Qırım mahkemeleriniñ qararınen Cemilevni qarşılağan bazı adamlarnı Rusiye qanunları boyunca 10 biñ rublege qadar cezaladılar.
XS
SM
MD
LG