Link açıqlığı

Qırımtatar halqınıñ yetekçisi, Ukraina halq deputatı Mustafa Cemilev qırımtatarlar Qırımda basım altında olğanını qayd ete – işğalci akimiyet olarnı öz tarafına çekmege tırışa.

Bu aqta o, mayıs 5-de, bazarertеsi künü, Kiyevde bildirdi, dep haber ete Radio Svoboda.

O, mayıs 3 künü, oña Qırımğa kirmege izin berilmegende, qırımtatar Meclis reisiniñ kütleviy tertipsizlik ve Rusiye sıñırınıñ qanunsız keçüvi içün cinaiy işlerniñ açıluvı aqqında resmiy ilânı endi bar olğanını ayttı.

«Endi qırımtatarlarğa (mayıs 3 künü Cemilevge Qırımğa kirmege yardım etmege tırışqanlarğa) vesiqalarnıñ teşkerüvi ile, Rusiye sıñırınıñ qanunsız keçüvi aqqında bildirüvler ile prokurorlarnıñ kütleviy ziyaretleri başlandı»,– dedi Cemilev.

Onıñ aytqanı kibi, numayışnıñ iştirakçilerine «Qırım Cumhuriyetiniñ prokurorı» temsilcileri kelip, olarnı yerli «akimiyet» ile işbirlikke çağıralar. Red etken insanlarnı mesüliet ile qorquza ve ticaretniñ alıp baruvına keder eteler, şu cümleden ticaret-faaliyetlerini teşkermege başlaylar.

Cemilev Qırım «prokurorı» Natalya Poklonskaya qırımtatar Meclisiniñ yasaq oluv imkâniyeti aqqında aytqanını da hatırlattı. Onıñ aytqanı kibi, eger de ofisler qapatılsa, Meclis ya yarı qanunsız, ya da qanunsız işke keçe bilecek.

Mayıs 3 künü Cemilevni Qırımğa kirsetmediler. Onıñ vatandaşları narazılıqnı kösterip, Aqmescit, Bağçasaray, Eski Qırım, Kezlev ve Qurman rayonınıñ Büyük Onlar qasabasında yollarnı blok ete edi.
XS
SM
MD
LG