Rusiyeni Kiyev akimiyeti tarafından fevral 21-ne ait añlaşma ve aprel 17-ne ait Jeneva beyanatına riayet etilmegeni açuvlandıra. Bunı bugün İTAR-TASS agentligine Rusiye tış işler naziriniñ muavini Grigoriy Karasin bildirdi.
Karasinniñ aytqanına köre, «Ukraina cenüp-şarqında ceza areketleri devam ete», «cenüpte milletçi-radikallar cevapsız areket eteler».
2014 senesi fevral 21-de Ukraina prezidenti Viktor Yaunkoviç ve parlament muhalifetiniñ vekilleri Avropa Birligi temsilcileriniñ qol tutuvı ile Kiyevde qan tökülmesiniñ toqtatılması ve Ukrainadaki vaziyetni al etüv aqqında añlaşmanı imzaladılar. Lâkin bir qaç saatten soñ Yanukoviç Kiyevden qaçıp ketti, böyle etip devlet yolbaşçısı vazifelerinden özü vazgeçti, amma bu adım atılmasında siyasiy raqiplerni qabaatladı.
Aprel 17-de Rusiye, Ukraina, AQŞ ve AB tış işler nazirleri Jeneva añlaşmasını imzaladılar. Vesiqa Ukraina etrafındaki kerginlikni yoq etmek içün imzalandı. Rusiye bir taraftan ve Ukraina, AQŞ ve AB - ekinci taraftan bir-birini vesiqağa riayet etilmegeninde sert bir şekilde qabaatlap başladılar.
