Link açıqlığı

Yüzlernen qırımtatarlar Qırımğa kelmesi yasaq etilgen Mustafa Cemilevni Ermeni Bazarda qarşılamağa keteler


Bugün saat 11:00 yüzlernen qırımtatarlar halqnıñ lideri, Ukraina halq deputatı Mustafa Cemilevni yarımadada qarşılamağa niyetleneler, «Rusiye akimiyeti» oña yarımadağa kelmege yasaq etti.

Qırım.Aqiqat malümatına köre, al-azırda «Ermeni Bazar» kiriş noqtasına taba yüzlernen qırımtatarlar kete. Bazıları qırımtatar bayraqlarınen keleler.

Olar bir qaç kolonna olaraq Qırımnıñ çeşit köşelerinden keleler. Şimdiki «akimiyet» tarafından maşinalar toqtatılmasın dep, bir kolonna olaraq ketmege istemediler.
Mustafa Cemilev Herson vilâyeti tarafından maşinanen «Ermeni Bazar» kiriş noqtasına keleyata. Malüm ki, tünevin onı Moskvadan Qırımğa yibermediler. O, yarımadağa uçaqnen kelecek edi.

Qırımtatar Milliy Meclisi bunı «serbest avuşma ceetten insan aq-uquqlarınıñ bozuluvı olaraq» tanıdı.

«Efsaneviy uquq qorçalayıcı, qırımtatar halqınıñ lideri Mustafa Cemilevni Vatanına – qorantası, tuvğanları, yaqın dostları yaşağan Qırımğa kirsetmeyip, qırımtatar halqınıñ açuvını çıqaralar», – dep aytıla Meclis beyanatında.

Şu sebepten «Ermeni Bazar» kiriş noqtasında Cemilevni qarşılav barışıq aktsiyasını keçirmege qarar alındı.
XS
SM
MD
LG