Link açıqlığı

Qırımtatar milliy Meclisi yarın, mayıs 3 künü, Hıdırlez bayramınıñ qayd etüvini lâğu ete.
Bunı Qırım.Aqiqat mühbirine Meclis reisiniñ muavini Nariman Celâl bildirdi.

Onıñ sözlerine binayen, bu qarar Aqmescitte Meclisniñ nevbetten tış toplaşuvında alındı. Onıñ sebebi – qırımtatar halqınıñ yetekçisi, Ukraina halq deputatı Mustafa Cemilev ile yüz bergen ziddiyettir. Hatırlatamız, oña bugün Moskva avalimanından Qırımğa yol bermediler.
Mustafa Cemilev qayd etüvden keçip olamağan soñ Kiyevge qaytmağa mecbur oldı.
Bunıñnen beraber, yarın Meclis vekilleri öz liderini qarşılamaq içün Armânsk sıñır noqtasına baracaq olalar.

«Saba Mustafa Cemilevni qarşılamaq maqsadımız ile Armânskqa yol almağa planlaştıramız. O bugün Kiyevden maşna ile çıqtı», – dep tasdıqladı olğan malümatnı Meclis reisiniñ muavini Ayder Acimambetov.

Evelleri Cemilev qırımtatarlarnı yarımadanıñ işğali şaraitlerinde bütünqırım Hıdırlez qayd etüvinden vazgeçmege çağırdı. Özü de bu tedbirde iştirak etmeycegini bildirdi. Böyle tevsiye bu sene Mecliske de berilgen edi.

Mütenasip muracaatnı Mecliske yollağan Qurultaynıñ teftiş komissiya reisi Ali Özenbaş bu qararnıñ maqsadı – ola bilecek tariklerniñ ögüni almaqtan ibaret olğanını bildirdi.
Aynı şu zamanda öz başına tayinlengen Qırım «akimiyetiniñ» temsilcileri Hıdırlezni Rusiye musafirleri ile qayd etmege niyetleneler. Olarnıñ arasında Tatarstan Cumhuriyetiniñ yolbaşçılığı da bar.

Hıdırlez qırımtatar halqınıñ eñ esas baar bayramı olaraq tanıla. O quralay ayınıñ birinci aftasınıñ cuma künü qayd etile ve saçuv mevsiminiñ başlanmasını belgiley.
XS
SM
MD
LG