Link açıqlığı

Qırım «non grata şahıslarnıñ» cedvelinden Avropa alâqaları olğan eki halq deputatnı çıqardılar


«Partiya regionov» firqasından Ukraina halq deputatı Tatyana Bahteyeva ve Sergey Klüyev şimdi özüni «Qırım Cumhuriyetiniñ Devlet şurası» dep adlağan sabıq Qırım parlamentiniñ tarafından tizilgen «non grata şahıslar» cedveline artıq kirmeyler.

Bunı müessiseniñ matbuat-hızmeti bildire.

Onıñ bergen malümatına köre, «Qırım Cumhuriyetiniñ Devlet şurasına» mezkür deputatlarnıñ resmiy hitapları keldi, mında olar «Vaqtınca işğal etilgen Ukraina toprağında vatandaşlarnıñ aq ve serbestliginiñ teminlevi aqqında» Ukraina Qanunnıñ qabul etilgeni içün kendi reylerini alğanlarını bildireler.

«Men iç bir vaqıt Qırım sakinleriniñ merağına qarşı çıqmay edim, em de çıqmam. Çünki men özüm, menim qorantam Qırımnı pek sevemiz ve onı küçlü, stabil ve inkişaf etken region olaraq körmek isteymiz», – dey Bahteyeva.

Alınğan muracaatlarnı baqıp, «Devlet şurası»nıñ uquq çıqarıcı, Devlet şurasınıñ işiniñ teşkil etüvi ve cemaat ile alâqa boyunca daimiy komissiyası Bahteyeva ve Klüyevni Qırım Cumhuriyetinde bulunğanı istenmez olğan şahıslar cedvelinden çıqarmağa qarar aldı.

Al-azırda şu cedvel 340 soyaddan ibarettir – bir vaqıtları Qırımnıñ «rus akimiyetiniñ» qanuniy olğanını tenqitke oğratqan ya da parlamentiniñ dağıtuvına ve Ukraina işğal etilgen territoriyaları aqqında qanunına qol tutqan Ukraina ve Qırım memurlarınıñ adlarından ibaret.

Şunı da qayd etmek kerek ki, işbu cedvelden çıqarılğan Sergey Klüyev Ukraina Yuqarı Şurasınıñ saytında Avropa Şurasınıñ parlament assambleyasında daimiy eyyetiniñ azası, AQŞ, Qıtay ile parlamentara alâqalar boyunca gruppanıñ yolbaşçısı ve Avstriya Cumhuriyeti ile parlamentara alâqalar boyunca gruppanıñ yolbaşçı muavini olaraq belgilene.

Bahteyeva da bir sıra memleketler ile, Avropa birliginiñ azaları da şu cümlede, parlamentara alâqalar boyunca gruppalarnıñ azası ola.
XS
SM
MD
LG