Link açıqlığı

Ukrainağa Rusiye ile informatsion işbirlikni toqtatmağ teklif eteler


Ukraina tele ve radioyayınlav sualleri boyunca devlet komiteti Ukraina nazirler komiteti ve Rusiye ükümeti arasında informatsiya saasındaki işbirlik añlaşmanı toqtatmağ teklif ete.

Bunı Ukraina tele ve radioyayınlav sualleri boyunca devlet komitetiniñ matbuat-hızmeti bildire.

Mezkür añlaşma ile taraflar eki devletniñ halqı bir-biri aqqında keñ malümatnı bilmesi içün şaraitler yaratmaq kerek edi.

Onı toqtatmaq teşebbüsi «Rusiye tarafından Ukraina ve Rusiye ükümeti arasında añlaşmalarnıñ daimiy sürette bozuluvı» sebebinden kelip çıqtı, deyler komitette.

Ayırıca mında, añlaşmalarğa baqmadan, Rusiye Ukrainağa qarşı informatsion cenkni başlağanını qayd eteler.

«Rusiye matbuat vastaları endi uzun müddet devamında devletimizniñ topraq bütünliginiñ bozuluvını teşviqat ete. Böyleliknen milletlerara ziddiyetler, zorbalıq ve ksenofobiya peyda ola. Rusiye teşviqatı totalitar rejiminiñ izinden ketip, media saasında olğan añlaşmalarnı nazarda tutmayıp, «deşetli teleküniniñ aqiqatını» meydanğa ketire», – dep aytıla beyanatta.

Mında şunı da qayd eteler ki, Rusiye teşviqatı ukrain halqınıñ öz mustaqil, demokratik, avropalı devletinde yaşamaq istegini başqa türlü köstere.

Aynı Rusiyeniñ Ukraina içki işlerine qarışuvınen yerli ve çetel jurnalistlerniñ işlerinde manialar peyda olmağa başladı. Rusiye ekstremistleri teleradiokompaniyalarnı zapt ete, jurnalistlerni tutıp ala, devlet teleradiokompaniyalarınıñ mülkini qanunsız sürette şahsiyleştire ve ilhr.
XS
SM
MD
LG