Link açıqlığı

Saatnıñ esas haberi

Meclis Tatarstan yolbaşçılığına Putin ile körüşüvni teşkil etmege rica ete


Qazan körüşüvinde qırımtatar halqınıñ Meclisi Tatarstan yolbaşçılığına Rusiye prezidenti Vladimir Putin ile körüşüvni teşkil etmege rica etti. Bunı QHA agentligine Meclis reisi muavini Nariman Celâl bildirdi.

«Ebet, böyle fikir ilân etildi. Daa doğrusını aytayım, biz bunı Tatarstan prezidenti, baş nazir ve yolbaşçılıq ile, Tatarstan devlet şurası, Bütün dünya tatarlarnıñ kongressi ile körüşüvlerde aytqan edik. Amma biz yalıñız şunı bildirmek isteymiz, RF böyle körüşüvniñ kerekligini añlap, bizni davet etse, biz tek o vaqıt oña qarşı adım etmege azır olurmız.Teşebbüs Kremlden çıqmaq kerektir», – dedi Celâl.

Nariman Celâlnıñ fikrince, RF yolbaşçılığı ile körüşüv – qırımtatarlarnıñ merağını saqlamaq içün Meclisniñ borcudır.

«Putin ile körüşüv, menimce, amelge keçmeli. Biliñiz ki, ne Refat Çubarov, ne men Rusiyege ziyaretimizden bir de bir hoş duyğularnı yaşamamız. Bu qırımtatar halqınıñ merağını saqlamaq içün etilecek bivasta borcumızdır. Eger de biz böyle adımdan vazgeçsek, ileride ne olacaq? Biz eñ azından qırımtatar halqı içün eñ aktual ve ağır suallerni, olarnıñ Qırımda yaşağanını muzakere etmelimiz», – dedi o.

O şunı da qayd etti ki, Qırım sualleri eñ yüksek seviyede çezile eken: «Bu qararlarğa tesir etmek içün bu qararlarnı alğan insannen subetleşmek kerek. Rusiyede bu şahıs prezidenttir».

Bunıñnen beraber, Meclisniñ sabıq reisi, Ukraina halq deputatı Mustafa Cemilev qırımtatarlarnıñ Putin ile körüşüvine qarşı çıqa.

«Men böyle türlü körüşüvlerge qarşı çıqam. Başta subet mevzusını bilmek kerek. Misal içün Rusiye ordularınıñ çıquvı aqqında olsa – bu başqa sual», – dep izaatladı Mustafa Cemilev.

Hatırlatamız, qırımtatar halqınıñ Meclisi aprel 25-28 künleri resmiy ziyaret ile Tatarstanda bulundı. Meclisniñ temsilcileri, Qırım baş nazir muavini Lenur İslâmov ve Reskomnats reisi Zaur Smirnov resmiy ziyaret ile Tatarstan yolbaşçılığı ile körüşti ve «Qazan – türk dünyasınıñ medeniy paytahtı –2014» festivalinde iştirak ettiler.
XS
SM
MD
LG