Link açıqlığı

Visa ödeme sisteması eki Rusiye bankı – SMP Bank ve İnvestkapitalbank kartları boyunca hızmetini toqtattı.

Visa matbuat hızmetiniñ beyanatında qayd etile ki, bu eki bank Amerika Qoşma Ştatlarınıñ iqtisadiy cezaları altında olğan şahıs ve şirketler cedvelinde bap, dep haber ete Azatlıq Radiosı.

Bundan evel diger halqara ödeme sisteması – MasterCard – Arkadiy ve Boris Rotenberglerniñ reberliginde olğan SMP Bank ve İnvestkapitalbank kartlarınen oğraşmaycağını bildirdi. Aynı ceza bu cedvelge kirgen Sobinbankqa da tesir etti. Lâkin bu banknıñ «Rossiya» bankına alâqası bar, onıñ içün o, bir aydan berli ceza altında qala.

AQŞ ilân etken cezalar cedveline Rusiye baş nazir muavini, «Rosneft» devlet cermay korporatsiyasınıñ prezidenti İgor Seçin, «Rostehnologii» devlet korporatsiyasınıñ baş müdiri Sergey Çemezov, Kreml memuriyetiniñ yolbaşçı muavini Vâçeslav Volodin, baş nazir muavini Dmitriy Kozak, Rusiye prezidentiniñ Qırımdaki vekâletli temsilcisi Oleg Belaventsev kirsetildi. Gennadiy Timçenko, Rottenbergler, ya da «Rossiya» bankınıñ reberliginde olğan 17 Rusiye şirketi de cezalanacaq.
XS
SM
MD
LG