Link açıqlığı

Saatnıñ esas haberi

Bağçasaray akimiyeti topraqnı tutıp alacaq


Bağçasarayda topraq damartıları olğan bazı adamlar eñ yaqın vaqıtta bundan marum qala bileler.

Bağçasaray yolbaşçılığınıñ matbuat ıhzmeti bildire ki, «Patriot» cemaat teşkilâtı eki yıl evelsi şeer şurası tarafından qabul etilgen «Bağçasaray şeeriniñ vatandaşlarına qurucılıq ve köy hocalıq işleri içün topraq damartılarınıñ ayırılması boyunca leyha azırlanması aqqında» qararını lâğu etmek muracaat etti.

Bağçasaray yolbaşçısı Konstantin Rubanenko cemaat teşkilâtınıñ muracaatını ögrenece ve baqacaq mahsus komissiyanı meydanğa ketirüv aqqında qarar azırlamağa avale etti. Bundan ğayrı, mezkür komissiya Bağçasaray şeer şurasınıñ toplaşuvında baqılacaq topraq damartılarınıñ şeer mal-mülkine keri qaytarılması aqqında qarar leyhasını azırlaması mümkün.

Şeer yolbaşçısınıñ fikirince, Bağçasarayda topraq damartılarını 8 yıldan berli beklegen 5 biñlik nevbet olğanda, şahsiy qurucılıq içün topraq damartılarınıñ ayırlıması aqqında qarar almaq olmay.

Şeer yolbaşçılığınıñ malümatına köre, Rubanenko Qırım «prokurorı» Natalya Poklonskaya adına mezkür qararlarnıñ qanun boyunca qabul etilmesi ve topraq damartılarını alğan adamlarnıñ vesiqalarını teşkerüv aqqında muracaat azırlamağa emir etti.
XS
SM
MD
LG