Link açıqlığı

Ukraina halq deputatı, qırımtatar halqınıñ yetekçisi Mustafa Cemilev mayıs 3 künü Bağçasaray rayonında keçirilecek Hıdırlez bayramında iştirak etmeycek.

Bunı o QHA agentligine bildirdi.

«Yoq, kelsem bile (Qırımğa bu vaqıtqace), anda barmaycam, menim bu aqta başqa fikrim bar», – dedi o.

Evelleri Cemilev qırımtatar milliy Hıdırlez bayramınıñ bu sene bütünqırım seviyesinde keçirilmesine qarşı çıqqanını bildirdi.

«Men Hıdırlеzge qarşı çıqtım, çünki şimdi oynamaq, muzıka çalmaq lâzim degil, memleket şimdi ağır vaziyettedir. Amma bu bizim milliy bayramımız ve akimiyet başında kimniñ turğanı müim degil, biz onı episi bir qayd etmek kerekmiz degen fikir bar edi. Amma bu Hıdırlezden işğalci akimiyet faydalanmaq istey – qaraçay, balqar, Rusiyeniñ diger halqlarını davet etip, qırımtatarlar Rusiye milletleriniñ qorantası ile dostlaşqanını köstermege isteyler. Ve bu tedbir bütünley akimiyet tarafından ödenile. Siziñ anda aytılacaq aqıllı laflarıñıznı kimse diñlemeycek, er kes oynağanıñızğa baqacaq», – qayd etti Cemilev.

Al-azırda o Kiyevde buluna ve Qırımğa ne vaqıt kelecegini bilmey, amma kendi ziyareti aqqında evelden bildirmege vade etti.

Hıdırlez qırımtatar milliy bayramınıñ keçirilmesi mayıs 3-de Bağçasaray rayonınıñ Novopavlovka köyünde olacaq.

Öz başına tayinlengen Qırım akimiyetiniñ «baş nazir muavini» Lenur İslâmovnıñ sözlerine binayen, Hıdırlez musafirleriniñ cedvelinde Qırım akimiyetiniñ vekilleri, ve çeşit memleketlerden, şu cümlede Rusiyeden (Tatarstan) insanlar bardır.
XS
SM
MD
LG