Link açıqlığı

Qırımtatarlar Bağçasaray şeer şurası icra komitetiniñ şeerde «nezaketli asker»ge eykel qoyulması qararını ğayet menfiy tarzda qabul ettiler.

Böyle haberni «Ükrinform»ğa Bağçasaray Meclisiniñ başlığı Ahtem Çiygoz bildirdi.

«Ahmaqlıq demekten, bu qararğa başqa söz tapalmayım. İcra komitettiniñ toplaşuvında bu qarar nasıl usulnen çıqarılğanını bizler daa ögrenirmiz. Men bellesem, bu Qırımdaki vaziyetni kerginleştirmek içün nevbetteki ıntıluv», – dedi Çiygoz.

Aprel 22-de Bağçasaray şeer şurası icra komiteti «Yerli müimlikte olğan yadikârlıqlarnıñ meydanğa ketirilmesi aqqında» qararnı çıqardı. Onıñ mündericesi böyledir: "Bağçasarayda Çehov soqağı civarında «Nezaketli askerge» adlı yerli müimlikte olğan, eali raatlığı elementlerine has, eykel meydanğa ketirmege».

Böyleliknen, yerli akimiyet mart 16 künü keçirilgen referendumda Bağçasaray sakinlerine serbest rey bermekni, emiş, temin etken, «yeşil forma kiygen nezaketli insanlarnı» alğışlamağa istegen ekenler.

Baştan Rusiye Prezidentı Vladimir Pütin Qırımda öz arbiylerniñ mevcut olğanını red etken edi, soñra anda «Qırımda referendumnıñ maniasız keçirilmesini temin etken» Rusiye askerleri olğanını tanıdı. Bu referendum neticelerine köre Qırım ğayet büyük suratnen zapt etildi.
XS
SM
MD
LG