Link açıqlığı

Rusiye Devlet Duması komitetiniñ reisi: Kavkaz ve Kubandan Qırımğa suv keçirmege iç mümkün degil.


Devlet Dumanıñ tabiat resursları, tabiat faydalanuvı ve ekologiya komitetiniñ reisi, Rusiye İlimler akademiyasının akademigi Vladimir Kaşin esap ete ki, suvnı Kavkazdan ya da Krasnodar ülkesinden Qırımğa keçirip ketirmege iç imkâniyet yoqtır.

Bu fikirni o İTAR-TASS-qa bergen intervyüsinde bildirdi.

Kaşin Rusiyeniñ qayd etilgen regionlarnıñ suv ceetten olğan meselelerine diqqat celp ettirdi.

"Don ya da Kuban özenlerinden suvnı keçirmege mümkün degil. Kavkaz ve Krasnodar ülkesi özleri de suv muhtaclığını çekeler. Bu yerde, belki de, bir mearetlik kösterip, tek Keriçni suvnen teminlemek mümkündir. Amma ondan ziyade degil", – esap ete akademik.

Suvnıñ bütilâtsiya usulınen alıp ketirmesi biraz kerçekke yaqınca.

"Yarımadağa keyfiyetli suvnıñ ketirmesinde bir mesele körmeyim. Eki yarım milliondan biraz artqaç eali – o qadar büyük degildir. Elbette, raatlanmağa kelgen ziyaretçiler bu miqdarnı emiyetli arttıra, amma diger taraftan, bizler 12-millionlıq Moskvanı qolaylıqnen bütillâtsiya suvınen teminlep olamız. Bir şey degil, bir mesele çıqmay", – dedi Kaşin.

O, böyle usulnen suvnıñ ketirilmesi güzel bir biznes olğanını da qayd etti.

"Suvnıñ bir litri – bir litr benzinden, bir litr sütten palı çıqa. Tüşünip oturmağa da kerekmey, mında biznes çalışacaq. Amma, böyle ketirüvniñ içtimaiy yönelişi yahşı işlenmek kerek. Biznes, ebet, biznestir, amma ealini, hususan, içtimaiy ceetten qorçalavğa muhtac tabaqalarnı, ıncıtmağa iç bir vaqıt olmay", – qayd etti akademik.

Rusiye köy hocalığı naziri Nikolay Födorov Qırımdaki suv teminlevi meselelerini tolusınen tek eki-üç yıldan soñra çezmege mümkün olacanını ilân etti.
XS
SM
MD
LG