Link açıqlığı

Saatnıñ esas haberi

Mecliske bu sene Hıdırlezni tantanalı keçirmemege tevsiye eteler.


Qırımtatar halqı VI Qurultayınıñ teftiş komissiyası Mecliske Qırımda mayıs 3 kününe qararlıştırılğan, Hıdırlezniñ umumqırım tarzda tantanalı qayd etilmesinden vazgeçmekni teklif etti.

Krım.Realiige Qurultay teftiş komissiyasınıñ reisi Ali Özenbaş bildirgenine köre, bu muracaat bayram vaqıtında provokatsiyalar hafvlığı peyda olmasınen bağlı.

«Qırımnıñ zapt etilmesi daa yanıçıq bulunğanda, siyasiy ceetten mürekkep devirde halqımız iç de bayramğa sevinip olamay ve davet etilgen Rusiye akimiyeti ve Federatsiya subyektlerine, ve, şu sırada, dünya cemiyetine bayram keyfini numayış etilmesi yersizdir», – dedi Özenbaş.

Bundan da ğayrı, teftiş komissiya şimdiki akimiyet bayramğa kelgen halqnıñ havfsızlığını teminlep olacağına şübe bildirdi.

Mecliske bu bayramnı azizlerde, şeerlerde ve qırımtatarlar yaşağan yerlerde keçirmege teklif ettiler.

Lâkin, Ali Özenbaşnıñ degenine köre, bu muracaat Meclis taraftan qabul olunmadı ve neticede evel qarar etilgen, «Bağçasaray – Aqmescit» yolunda yerleşken «Şaherizada» kompleksi yanında adet olğan yerde, mayıs 3 künü keçirilecek umumqırım bayramı red etilmedi.

Bundan evel, qırımtatarlarnıñ lideri Mustafa Cemilev Qırım işğal olunğan tarzda Hıdırlezniñ qayd etilmesiniñ tarafdarı olmağanını bildirgen edi.

Cemilev akimiyet içün bu «muvafaqiyetli stsenariy» olmasını da red etmey. Aynı zamanda o, bu bayramnı qırımtatar ve ukrain milliy bayraqlarınen keçirmekni közde tutqanını bildirgen edi.

Qırımtatar milliy bayramı Hıdırlez «quralay» (mayıs) ayınıñ birinci aftasınıñ cumasında eküv mevsiminiñ başı olaraq qayd etile edi.
XS
SM
MD
LG