Link açıqlığı

Cemilev qırımtatarlarnıñ reabilitatsiyası fermanı aqqında: «Rusiye özü bizim ögümizde reabilitatsiya etilmeli»


Qırımtatar halqınıñ lideri Mustafa Cemilevniñ fikirince, Rusiye prezidentiniñ qırımtatarlar ve Qırımdan sürgün etilgen diger halqlarnıñ reabilitatsiyası aqqında emri – yarımadada Rusiye siyasetini pekitmek maqsadınen yapılğan siyasiy adımdır.

Bunı o, Qırım.Aqiqat. bildirdi.

«Rusiye tarafından reabilitatsiyağa muhtac degilmiz. Rusiye özü bizim ögümizde 1944 senesi yapılğan cinayet içün reabilitatsiya etilmek kerek», – bildirdi o.

O, bu ferman keç qabul etildi degen fikirde.

«Olar bu emirni toprağımıznı işğal etken soñ çıqardılar – meraqlı bir sual bizim içün. Ebet, Rusiye bizim içtimaiy problemlerimizniñ al etilmesinde iştirak etmeli, lâkin bu da memleketlerimiz arasında tizilgen añlaşmalarğa uymaq kerek... Rusiye 1991 senesi Rusiye Federatsiyası olaraq ilân etilgen soñ sürgünlikni cinayet olaraq tanıp, qırımtatarlarnıñ qaytıp kelmesi ve olarnıñ yaşayış şartları meselesini öz boyunnına almaq kerek edi», – dep bildire qırımtatarlarnıñ lideri.

Onıñ fikirince, bundan evel «Rusiye teşviqatı Ukraina qırımtatarlarnıñ qaytmasına imkân berip, rusiyelilerge qarşı demografik vaziyetni kerginleştire, dep ayta edi».

«Şimdi ise apansızdan öyle bir ürmet», – dep qayd etti o.

Aprel 21-de Rusiye prezidenti Vladimir Pütin qırımtatarlar ve Qırımda Stalin yılları repressiyalardan zarar körgen diger halqlarnıñ reabilitatsiyası aqqında fermannı imzalağanını bildirdi.
XS
SM
MD
LG