Link açıqlığı

Qırım abituriyentleri iyün 27-ne qadar qıtada VNO imtianlarını bere bileler – Tasil nazirligi


Qırım ve Aqyarda tış mustaqil imtianlarını bermek içün qayd etilgen abituriyentler iyün 3-den başlap iyün 27-ne qadar Ukrainanıñ diger regionlarında sınavdan keçmeleri mümkün.

Bunı Ukraina tasil ve ilim Nazirliginiñ matbuat hızmeti bildire.

Onıñ malümatına binaen, testler qoşma sessiya devamında – iyül 4-den başlap 11-ne qadar, em de qısqartılğan sessiya devamında – iyül 14-den başlap 17-ne qadar, berilmesi mümkün.

Qırımlılarğa qayd malümatlarına deñişmeler kirsetilmesi içün müddet arttırıldı.

«Abituriyent esas sessiya devamında tış mustaqil imtianlarını berecek olsa, aprel 30-na qadar yañı adres boyunca ğayrıdan qayd etilmeli. Bunıñ içün abituriyent tasil keyfiyetine qıymet kesüv ukrain merkeziniñ saytında yerleştirilgen malümat saifesine kirip, tış mustaqil imtianları vaqtında yerleşüv yerini qayd etmeli. Arizanı basıp çıqarmaq ve toldurıp, tış mustaqil imtianları sertifikatınıñ kopiyasınen beraber tasil keyfiyetine qıymet kesüv regional merkezine yollamaq kerek», – dep qayd eteler Tasil Nazirliginde.

Abituriyentniñ belli bir sebebi olsa, o, qoşma sessiya devamında tış mustaqil imtianlarını bere bile. Testlev noqtaları er bir vilâyet merkezinde olacaq. Mayıs 1-den 15-ne qadar ğayrıdan qayd etilmek mümkün.

Abituriyentniñ esas ve qoşma sessiyaları devamında tış mustaqil imtianlarını bermek imkânı olmasa, o, qısqartılğan sessiyadan faydalana bile.

Testlev noqtaları Ukrainanıñ er bir vilâyet merkezinde aliy oquv yurtları esasında çalışacaq. İyün 16-dan başlap 30-na qadar ğayrıdan qayd etilmek mümkün.

Tış mustaqil imtianlarınıñ iştirakçilerine testler keçirilecek yer ve vaqıt aqqında malümat abituriyentlerniñ informatsion saifelerine kelecek davetname-kiriş kâğıtında qayd etilecek.
XS
SM
MD
LG