Link açıqlığı

«Qırım Cumhuriyetiniñ Devlet şurası» olaraq adlanğan qanunsız Qırım parlamentiniñ yolbaşçısı, «Yedinaya Rossiya» firqası Qırım bölüginiñ kâtibi Vladimir Konstantinov Moskvada Rusiye baş naziri Dmitriy Medvedev ile körüşti.

Bunı Konstantinovnıñ matbuat kâtibi Oksana Korniyçuk bildirdi.

Onıñ malümatına köre, körüşüvde Medvedev «Rusiye Federatsiyasınıñ yañı subyektleri içün keçici müddet qolay-qolay keçsin» dep, er şey yapmağa avale etti.

Bundan ğayrı, Medvedev Qırımnıñ regionlarında «Yedinaya Rossiya» qabul odalarınıñ işini faalleştirmege çağırdı.

«Er bir siyasiy küçniñ vazifesi – adamlarğa yardım etmek. Bizler adamlarnen bağdamız, bizler içün bu müim bir şey. Bu qabul odalarınıñ işini teşkil etmege rica etem. Bilgenime köre, merkeziy qabul odasına qırımlılarnıñ bir çoq muracaatları keldi, olarnı talil etecekmiz ve diqqat ayıracaqmız», – dep ayttı Rusiye baş naziri.

Qayd etmeli ki, Qırım separatistleriniñ firqa meseleleri boyunca Moskvağa ziyareti resmiy iş vaqtında oldı. Bergi tölegenler bunıñ parasını bere. Medvedev de Qırım separatistlerinen körüşmek içün Rusiye bücetinden tölenilgen iş vaqtını sarf etti.
XS
SM
MD
LG