Link açıqlığı

Yalta balaları Qırım işğalinden sebep Turkiyege festivalge barıp olamaycaqlar


«Çernomoroçki» Yaltanıñ belli oyun taqımı Turkiyede balalarnı qoruv Halqara kününe bağışlanğan bayramda iştirak etip olamaycaq.

Oyun taqımı keçken sene Yaltanıñ qardaş şeeri – Antalyanıñ yolbaşçılığı tarafından davet etildi, dep bildire Qırım.Aqiqat mühbiri.

Yalta şeer şurasınıñ tış işler ve qardaşlıq işbirligi bölüginiñ yolbaşçısı Lübov Gribkovanıñ bildirgenine köre, ansambl naqliyat problemleri bar olğanından sebep Turkiyege barıp olamaycaq.

Malüm ki, Rusiyeniñ yarımada işğalinden sebep grajdanlıq aviatsiyasınıñ halqara teşkilâtı Qırım ava seferlerini yasaq etti.

«Turkiye kurort şeeriniñ yolbaşçısı doktor Mustafa Akaydın mektüpte yazğanlarına köre, Yaltanıñ istidatlı mektep talebeleri çıqışta bulunıp, «şeerler arasında dostluq munasebetlerini pekitecek ve dünyada barışıq olğanını kösterecekler». Lâkin grajdanlıq aviatsiyasınıñ halqara teşkilâtı Qırım ava seferlerini yasaq etti», – dep qayd etti Gribkova.

Onıñ aytqanına köre, «bazı halqara teşkilâtlarnıñ siyasiy qararları» farqlı memleketlerden adamlar arasında dostluq munasebetleriniñ inkişafına keder etmekten ğayrı, bağ üzülmesi ve reqabetlikniñ sebebi ola.
XS
SM
MD
LG