Link açıqlığı

Almaniya tış işler naziri: Ukraina dağılması Rusiyege kerekmey


Almaniya tış işler naziri Frank-Valter Ştaynmayyerniñ fikirince, Ukraina dağılması Rusiye menfaatlarına uyğun kelmey.

Bunı o, Berlindeki matbuat konferentsiyasında bildirdi, dep haber ete Azatlıq Radiosı.

Tış işler nazirligi yolbaşçısınıñ zanınca, «Ukrainanıñ devlet ve cemiyet olaraq siyasiy kelecegi olmasa, Rusiye ve Ukraina arasında siyasiy ve iqtisadiy munasebetler de olmaycaq».

Ştaynmayyer Rusiyeniñ Ukrainağa nisbeten areketlerini «siyaset ve halqara aq-uquqları ceetten kelişmegenini» ayta.

Almaniya tış işler nazirliginiñ yolbaşçısı dey ki, halqara aracılar buhran al etilmesi içün areketlerini toqtatmamalı. O, bu yönelişte «birinci adım» olaraq halqara kontant gruppasınıñ meydanğa ketirilüvini tanıy. İşbu gruppa «Avropa Birligi ve AQŞ nezareti altında Ukraina ve Rusiye arasında muzakereler keçirilmesine» yol aça bile.

Bu afta AQŞ, AB, Rusiye ve Ukraina diplomatları kelecek afta buhran al etilmesi içün dört taraflı körüşüv ötkerilmesi aqqında añlaştılar. Muzakerelerde tış işler nazirlikleriniñ baş reberleri iştirak etecek.
XS
SM
MD
LG