Link açıqlığı

Kiyev memuriy mahkemesi 2014 senesi mart 10-da QMC Yuqarı Şurasınıñ prezidiumı tarafından qabul olunğan qararnı qanunsız olaraq tanıdı ve lâğu etti. Böyle davanı baş prokurorı vazifelerni eda etken Oleg Mahnıtskıy açqan edi. İşbu qararğa binayen, Qırımnıñ baş prokurorı vazifeleri Natalya Poklonskayağa berile edi

Ukraina Baş prokuratorasınıñ matbuat-hızmetinde olğan malümatqa köre, bu davanı baqqanda, mahkeme Ukraina Anayasa qaidelerine esaslandı. Olarğa binayen, Ukraina prokuraturası yekâne tertibatnı teşkil ete (121-nci madde), organlarınıñ faaliyet tertibi ve teşkil olunuvı ise qanunğa köre belgilene (123-nci madde).

Böyle konstitutsion qaideler Qırım Yuqarı Şurasınıñ uquqiy aktlarınıñ idare etüvinde, prokuratura organlarınıñ faaliyet tertibi ve teşkil olunuvında, Qırım prokurorı vazifesine birini tayin etüvinde ve şu vazifelerden boşatuvında istesnalarnı közde tutmay.

«Böyleliknen, mahkeme Qırım MC-niñ prokurorını tayin etmek içün vekâletler yalıñız Ukraina baş prokurorında bar olğanını tasdıqladı», – dep ayttıla beyanatta.

Ukraina Baş prokuratorasında Qırım Yuqarı Şurasınıñ prezidium qararı prokuratura faaliyetiniñ uquqiy negizlerini, tertibatınıñ birdemligini ve merkezleştirüvini bozğanını qayd eteler.

Qırım Yuqarı Şurası Natalya Poklonskayanı mart 11 künü cumhuriyet prokurorı vazifesine tayinledi.

Mart 18 künü mahkeme Qırımnıñ uquq qorçalav müessiseleriniñ öz başına tayinlengen yolbaşçılarnı, şu cümlede Natalya Poklonskayanı da yaqalamağa qararnı qabul etken edi.
XS
SM
MD
LG