Link açıqlığı

Qırımda Ukraina vatandaşlığını saqlap qalacaq olğan insanlarnıñ sayısı arta, dep bildire Azatlıq radiosı. Bunı Qırımda Ukraina vatandaşlığından vazgeçmege istemegen Yelizaveta Bogutskaya tasdıqladı.

«Men Federal migratsion hızmetine kelgende, Rusiye vatandaşlığından vazgeçecek insanlar nevbetinde ya ekinci, ya üçünci edim. Bugünki künde nevbette 137 adamdan ziyade tura», – qayd etti Bogutskaya.

Ukraina vatandaşlığından vazgeçmegen qırımlınıñ aytqanına köre, Ukraina vatandaşı qalmaq içün Federal migratsion hızmetine kelip, Rusiye vatandaşlığından vazgeçüv aqqında ariza yazmalı. Siziñ çağına yetmegen balalarıñız olsa, ve siz olarnıñ Rusiye vatandaşları olmasını istemeseñiz, olarnı da arizada qayd etesiñiz. Böyleliknen, olar çağına yetken soñ, Ukraina vatandaşları olalar.

Bogutskaya dey ki, migratsion hızmetiniñ Federal noqtaları pek az. Birer dane Aqmescit, Qarasuvbazar ve Bağçasarayda bar. Er bir noqta Aqmescitten 40 km mesafede yerleşe. Lâkin Kefe ve Keriçte bayağı insan Rusiye vatandaşları olmağa istemey. Aprelniñ 18-den soñ Rusiye vatandaşlığından vazgeçmek imkânı olmaycaq ve qırımlılar Rusiye vatandaşları olıp qalacaqlar. Yarımadadan tış bulunğan insanlarnıñ bu sebepten büyük problemleri bar. Migratsion hızmetine kelmege imkânı olmağan insan anda mektüp yaza bile. Mında ariza, pasport kopiyası ve çağına yetmegen balalarnıñ doğuv şeadetnamesiniñ kopiyası olmaq kerek. Arizañız qabul etilgen soñ, sizge cevap kelecek. Böyle bir vesiqa Rusiye vatandaşı olmağanıñıznı isbatlaycaq. Eñ esası, mektüpni aprelniñ 18-ne qadar yollamaq.

Qırım sakininiñ fikirince, Ukraina vatandaşlığını tasdıqlağanda olğan manialar aselet yapıla. Soñra yarımada sakinleriniñ tek üç fayızı Ukraina terkibinde qalmağa qarar aldı, dep aytacaqlar.

Bundan ğayrı, Yelizaveta Bogutskayanıñ bildirgenine köre, bir çoq qırımlılar Rusiye pasportını almaycaqlarını aytalar. Buña baqmadan, olar Rusiye vatandaşları sayılacaq.

Rusiye vatandaşlığından vazgeçmek içün qırımlılarğa bir ay berildi. Aprelniñ 18-de arizalarnı qabul etüv müddeti yekünlene.
XS
SM
MD
LG