Link açıqlığı

Kapitan Demyanenko: «Rusiye ukrain askerleriniñ qarşılığından ayrette qala»


Rusiye oña Qırımda ukrain arbiylerinden kösterilgen qarşılığından ayrette qala.

Bunı esirlikten azat olğandan soñ Kiyevde jurnalistlerge 2-nci rang kapitanı Vyaçeslav Demyanenko bildirdi, dep haber ete «Ukrainskaya Pravda».

«Er bir serdarğa ayırı sualler qoyula edi. Qısımlarda olğan silâlarnıñ teslim oluvı tertibi aqqında sualler bar edi, bazı bir qısımlarğa ise: ne içün Qırımda olğan silâlı quvetler böyle qarşılıqnı köstereler – degen sual berile edi», – dedi Demyanenko.

Esirlik aqqında olğan sualge o, bu al esirlikke degil de «serbestliginiñ sıñırlavı»na oşağanını ayttı.

«Bizni esirlikke alğanlarını aytmaz edim. Bizni kimse horlamay edi. Menimce, Rusiye bizni anda tutıp, nasıldır bir kendi merağını tüşüne edi. Amma buña «esirlik» demez edim. Serbestliginiñ sıñırlanuvına oşağan bir şey», – qayd etti arbiy adamı.

Onı rusiye tarafını almağa kimse zorlamağanını da ayttı. «Adamlarnı kimse sıqmay edi, olarğa serbest saylav imkânı bere ediler», – dedi o.

Onı nasıl etip yolladılar degen sualge o, betleri qapalı olğan insanlar onıñnen laf etmegenlerini ayttı. O künü ise «kirip: azırlanıñız, siz Ukrainağa ketesiñiz – dep ayttılar».

Onı arbiyler ya da FSB hızmetçileri tuta ediler dep sorağanda, o: «Men bellesem, anda episi uquq saqlav organlarınıñ ve mahsus hızmetleriniñ temsilcileri bar edi».

Cumaaqşamı künü oña arbiy qısımından çoq arbiy adamı kelgenini ayttıp keçti. Ve Mudaafa Nazirliginde «yolbaşçılarnen bazı subetlerini» keçirip, olarnen körüşmege planlaştıra.

Çonğarğa onı RF temsilcileri alıp ketken edi. «Soñra yahşı adamlar meni alıp mında ketirdiler», – dep qoştı o.

Demyanenko Mudaafa Nazirligine «ukrain arbiylerini qaytarmaq içün ve RF ukrain arbiylerine tehnika ile qıtağa ketmege imkân berüvi içün zaruriy areketlerini yapmağa» ricada bulundı.
XS
SM
MD
LG