Link açıqlığı

Ukraina tış işler nazirligi «Qırım akimiyetinen» işbirlik yapacaq Meclisni añladı


Ukraina tış işler nazirligi Meclisniñ özüni «Qırım akimiyeti» olaraq ilân etkenlernen işbirlik yapmaq qararını añladı.

Bunı Tış işler Nazirliginiñ informatsion siyaseti departamentiniñ müdiri Yevğen Perebiynis bildirdi, haber ete RBK-Ukraina.

«Olarnıñ qabul etken qararlarnı qabul etmege aqları bar. Bizler olarnıñ qararlarını añlaymız, çünki şimdi Qırımda qırımtatarlarnıñ vaziyeti pek ağır ve murekkep. Qırımtatarlar Ukraina topraq bütünligine qol tutqanlarını, Qırım işğali ve qanunsız referendumnı tanımağanlarını bilemiz», – qayd etti Perebiynis.

O, şunda emin ki, qırımtatar vekilleriniñ yapqan areketleri «Qırım Ukrainanıñ oldı, bar ve olacağını» tasdıqlaycaq.

Tünevin Meclis eki temsilcisini Qırım nazirler Şurasına çalışmağa yolladı. Böyle etip, Qırımda öz başına ilân etilgen ükümet «baş naziriniñ birinci muavini» Lenur İslâmov oldı, milletlerara munasebetler ve sürgün olunğan grajdanlarnıñ işleri boyunca cumhuriyet komitetiniñ reis vazifesine Zaur Smirnov tayin etildi.

Bugün, aprelniñ 2-de, Qırım Cumhuriyetiniñ Devlet şurası olaraq adlanğan qanunsız Qırım parlamentiniñ prezidiumı mezkür tekliflerni tasdıqladı.
XS
SM
MD
LG