Link açıqlığı

Qırım Muhtar Cumhuriyetiniñ kurort ve turizm nazirliginiñ sabıq yolbaşçısı Aleksandr Liyev Qırım Cumhuriyetinde bulunması istenmez olğan şahıslar cedveline kirsetildi.

Böyle bir qararnı Qırım Cumhuriyetiniñ Devlet şurası olaraq adlanğan qanunsız Qırım parlamentiniñ prezidiumı qabul etti, dep bildire şuranıñ matbuat hızmeti.

Malüm ki, Qırımda «non-grata şahıslar» cedveline 330 adam kirsetildi.

Qanunsız Qırım parlamenti prezidiumınıñ qararına binaen, Aleksandr Liyevniñ aytqanları referendum neticeleri ve federal anayasa qanunını şübege oğrata eken.

Liyev şimdi yarımadada degil. O, böyle bir qararnı iç beklemedi.

«Qırım devlet şurasınıñ prezidiumı meni «qara cedvelge» kirsetip, tuvğan yarımadama kelmege yasaq etti... Eminim, bu qırımlılarnıñ qararı degil, tek bazı deputatlarnıñ qararıdır. Söz sırası, olarğa yaramay bir şey yapmadım. Daa üç ay evelsi menim işimni muvafaqiyetli olaraq tanığan ediler», – dep yaza özüniñ Facebook saifesinde Liyev.
XS
SM
MD
LG