Link açıqlığı

Qırım marşrutka ve tükânlarında ufaq aqçanı almaylar, banklarda ise kâğıt aqçağa deñiştirmeyler. Bu haber 15minut saytında bildirile.

Soñki künleri cemiyet naqliyesinde yol parası ufaq aqçanen qabul olunmay. Ufaq paranı bermege istegen yolcularnı kimerde arabadan enmege rica eteler. Qaytımnı ise yalıñız ufaq paranen bereler.

Marşrutka aydavcısınıñ aytqanına köre, ufaq paranı «çoq olğanı» içün qabul etmeyler.

Neşirde yazıla ki, ufaq paranı Aqmescitniñ bazı tükânlarında da qabul etmeyler. Sebebini añlatmaylar, tek «yolbaşçılarnıñ yasaqları» aqqında aytalar.

Bunıñnen beraber Qırım sakinleri şu paranı küpüralarğa da deñiştirip olamaylar. «Sberbank Rossii» Aqmescit bölükleriniñ birisinde ufaq aqçanı «Natsbank sıñırlağanı» içün qabul etmegenlerini bildirdiler.

«Natsbank Qırım boyunca sıñırlavnı kirsetti. Olar banklardan ufaq paranı qabul etmeyler», - dedi keñeşçi.

İşbu banknıñ diger bölüginde aqçalarnı tek bir aftadan soñ boza bileceklerini añlattılar, çünki al-azırda «yapılacaq iş pek çoqtır». «ÇBRR» bankında ise öz areketlerini «yuqarıdan kelgen yasaq»nen añlatalar.

Ukraina Milliy bankınıñ Qırım bölüginde bildirdiler ki, «ufaq aqçalar sıñırlavsız, ödevlerniñ bütün çeşitlerinde qabul olunmalıdır».
XS
SM
MD
LG