Link açıqlığı

Tanılmağan Qırım Cumhuriyetinde Rusiye pasportlarını umumqırım referendumından 3 ay keçüvinden soñ da bermege devam etecekler, dep bildirdi Federal migratsion hızmetiniñ baş muavini Anatoliy Fomenko.

Mezkür malümatnı qanunsız Qırım Cumhuriyetiniñ matbuat-hızmeti bildire.

«Qırım Cumhuriyetinde Rusiye pasportlarınıñ resmiyleştirüvi ve berüvi 3 aynen sıñırlanmaycaq, – dedi Fomenko. – Bu müddet devamında FMH Qırım sakinleriniñ ekseriyeti içün pasportlarını azırlar. Soñra Qırım Cumhuriyeti ve Aqyar ealisi içün pasportlarnıñ berüv ketişatı er zamanki sürette olıp keçecek».

Mında şunı da qayd ettiler ki, Qırım Cumhuriyetiniñ Rusiya Federatsiyasına qoşuluvı ve Rusiye Federatsiyası terkibinde yañı subyektleriniñ peyda oluvı aqqında añlaşmanıñ 5-nci maddesine binayen, Ukraina vatandaşları ya da grajdanlığı olmağan, amma 2014 senesi mart 18 kününe Qırım Cumhuriyetinde ya da Aqyarda daima yaşağan insanlar Rusiya Federatsiyasınıñ vatandaşları olalar.

Olğan vatandaşlığını ve (ya da) çağına yetmegen balalarınıñ Ukraina vatandaşlığını saqlamağa ya da grajdanlıqsız yaşamağa isteklerini bir ay devamında bildirgenler bu qarardan istisna olalar.

Migratsion hızmetine Rusiye pasportnı almaq içün 20 biñ Qırım sakini ariza yazdı, olardan 2,5 biñden ziyadesi endi resmiyleştirildi.

Rusiye vatandaşlığını qabul etmege istemegen Qırım sakinleri 2 biñ rusiye rublesi (500 grn) miqdarında bergini ödemek kerekler.
XS
SM
MD
LG