Link açıqlığı

Harkov sakinleri Qırımdan kelgenlerini qabul etmege azırlana, dep yaza «Segodnâ».

Yarımadanı terk etmege ya da bütünley köçip ketmge istegenleri içün Harkov vilâyetinde mahsus telefon çalışmaqta: (067) 579-42-63. Göñülliler telefon bağlarını qabul eteler ve, acet olğanda, olarnı profil idarelerge keçireler.

«İnsanlar Qırımdan alıp çıquvınen oğraşqan şahıslar aqqında soraylar. Ukrainada yaşamaq içün vesiqanı alğan, amma grajdanlıqnı daa elde etmegenler sıñırdan keçip olamaylar, şunıñ içün onı almaq mümkün olğan yerlerini qıdıralar. İş tapmaq imkânları aqqında da meraqlanalar. Köçip kelmege istegen, amma yaşamaq içün ayırı bir regionı seçip almağanlarğa biz akimiyet telefon yollağınıñ nomerini beremiz», – tarif etti «Krasnıy krest» vilâyet teşkilâtınıñ reis muavini Valentina Kostenko.

İçtimaiy qorçalav vilâyet departamentinde köçip kelgenlerini yerleştirmek içün faydalana bilecek yerler aqqında malümat toplaylar ve köçüvden soñ içtimaiy ödevleri ile bağlı olğan suallerge cevap bereler.

«Ebet, uzun müddetke berile bilecek evler yoq. Amma Harkovda vaqtınca yaşamaq içün yataqhane odalarını bermege çare bar. Vilâyette ise şifahane ve turistik bazalarında yerleştirmege azırlar», – dedi departamentiniñ müdir muavini Tatyana Babenko.
Qırımlılarnı Çervonıy Donets qasabasındaki gaz çıqarğan işhaneniñ yataqhanesinde yerleştirmege azırlar. Mında 4 kişilik 3 odanı bere bileler. Daa 12 insannı Lozovaya civarındaki esli başlılarnıñ baqımı boyunca territorial merkezinde qabul etmege imkân bar.
Yerli rayon devlet administratsiyasında tarif ettiler ki, merkezde boş odalar, ortaq aşhane bar, bedava yemekni de temin ete bileler. 20 insannı bir qaç ayğa Peçenejsk suv anbarı kenarında yerleşken «Elat» eglendirici-sağlamlaştıruv kompleksinde qabul etmege azırlar.

Neşirniñ bergen malümatına köre, yarımadadan insanlar tek qorantalarnen degil de, yalıñız da keteler. Qırım studentleri Harkov aliy oquv yurtlarına keçüvnen bağlı olğan suaalerine cevap qıdıralar. Karzina adına Harkov Milliy Universitetiniñ elektron poçtasına endi bir qaç studentten muracaat kelgendir.

Qırımdan 500 qaçaqnı, şu cümlede qorantalarınen beraber kelgen 120 arbiy hızmetçini de qabul etmege azır olğanlarını Nikolayev vilâyet devlet administratsiyasında da bildireler.
XS
SM
MD
LG