Link açıqlığı

Saatnıñ esas haberi

Qırımda topraq berüvini toqtatalar


Öz başına tayinlengen Qırım akimiyeti topraq berüvini ve cumhuriyet mülküniñ şahsiyleştirüvini toqtatmağa qarar aldı.

Bunı tanılmağan Qırım Cumhuriyetiniñ birinci baş nazir muavini Rustam Temirgaliyev öz Facebook saifesinde bildirdi.

«Qırım Cumhuriyeti toprağınıñ inkişafı boyunca esas plannıñ tasdıqlanuvına qadar bu qarar öz küçüni coymaycaq. Onıñ azırlanuvınen Qırım müessiselerinen birlikte RF regional inkişafı Nazirligi ve qurucılıq Nazirligi de oğraşaycaq», – dep yazdı o.

Temirgaliyevniñ bergen malümatlarına köre, Qırımda olimpik Soçiniñ inkişafınen oğraşqan mütehassıslar çalışalar. Tanılmağan Qırım Cumhuriyetiniñ topraq inkişafı boyunca kontseptsiya aprel 25 kününe qadar azırlanmalı.

Qırım referendumnıñ neticesinde mart 16 künü Qırım RF terkibine kirdi. Mart 21 künü Rusiye prezidenti Volodımır Putin Qırım ve Aqyarnıñ Rusiyege federatsiya subyektleri olaraq qoşuluvı aqqında qararnı imzaladı. Faqat Ukraina ve memleketlerniñ ekseriyeti, şu cümlede AQŞ ve Avropa Birligi Qırım referendumnıñ neticelerinen razı olmağanlarını bildireler.
XS
SM
MD
LG