Link açıqlığı

Qırımğa Rusiye muftiler Şurasınıñ temsiliy eyyeti keldi


Bugün Qırımğa resmiy ziyaret çerçivesinde Rusiye muftiler Şurasınıñ temsiliy eyyeti keldi.

15 minut saytınıñ malümatına köre, eyyet başında Rusiye Avropa qısımında yaşağan musulmanları diniy idaresiniñ başlığı şeyh Ravil Gaynutdin tura.

Eyyet azaları cumhuriyet yolbaşçılığı, Qırım diniy liderleri, qırımtatar milliy Meclisiniñ vekilleri ve yerli musulmanlarınen körüşüvlerini keçirmege planlaştıra.

Rusiye eyyetiniñ erkânına DUMER muftiyniñ birinci muavini Damir-hazrat Muhetdinov, Moskva Memorial camisiniñ baş imam-hatibi Şamil-hazrat Alâutdinov ve Moskva iş adamı, metsenat, ATR qırımtatar telekanalınıñ saibi Lenur İslâmov kirdiler.

Musafirlerni Aqmescit avalimanında Qırımda RFnıñ baş konsulı Vyaçeslav Svetliçnıy ve Qırım muftisiniñ muavini qarşıladılar.

«Bir birimizge qardaşmız, tek dinimiz degil de, qanımız da bir. Şunıñ içün eminliknen ayta bilem ki, ziyaretim menim içün, Rusiye musulmanları içün pek faydalıdır. Menimce, biz muftiyniñ, qırımtatar Meclisiniñ yolbaşçılarınıñ sözlerinden olarnıñ isteklerini, qorqunçlarını, ümüt ve fikirlerini bilermiz. Bu maqsat ile keldim», – dep ayttı jurnalistlerge Ravil Gaynutdin.

Onıñ aytqanına köre, Qırım ziyaretiniñ daa bir maqsadı «Qırımda vaziyetiniñ tınç çezilüvine ve milletlerara ve dinlerara razılıqnıñ saqlanuvına yardımcı olmaq»tır.

ATR telekanalınıñ Zaman haber hızmetiniñ bergen malümatına köre, Qırımğa Rusiye muftiler Şurasınıñ eyyeti Qırım musulmanları muftisiniñ daveti ile keldi. Olar Qırımda eki kün devamında bulunacaqlar.

Şeyh Gaynutdinniñ aytqanına köre, o «qırımtatar halqınıñ keyfine tesir etmege, halqınıñ göñülinde olğan qara ıncıtuvnı yoq etmege» ister edi.

«Eger de Rusiye qırımtatarlarğa qarşı qabaatlarnıñ adaletsiz olğanını tanısa, olarnı aqlasa edi. Teessüf ki, al-azırda böyle adiseler körünmey», – dedi o.
XS
SM
MD
LG