Rusiye Federatsiyasınıñ İçki işler nazirligi ve Qırım Cumhuriyeti boyunca Rusiye Federatsiyası içki işler nazirliginiñ hadimleri tanılmağan Qırım Cumhuriyetinde Ukraina ile sıñırğa yaqın yerleşken rayonlarda aşırıcılarnı qıdıra ve olarnıñ tarafından ola bilecek provokatsion areketlerge yol bermemege tırışalar.
Qırım içki işler nazirliginiñ saytında berilgen malümatqa köre, umumiy gruppalar tizildi, olarnıñ erkânına ise «Berkut», Devlet avtoispetsiyası, OMON ve Rusiye Federatsiyası İçki işler nazirliginiñ hadimleri kirdi.
Umumiy gruppalar «Çonğar», «Turetskiy val» ve «Perekop» noqtalarında çalışa.
İşbu tedbirler çerçivesinde qanunsız alda elde etilgen silâ, mahsus aletler, narkotik ve diger yasaq etilgen maddeler, em de sahte vesiqalar ve naqliyat vastalarınıñ işaretleri tapılsa, olarnı alacaqlar.
Nazirlikte qayd etkenlerine köre, al-azırda Qırım Rusiye Federatsiyasınıñ qanunlarına boysuna ve uquq qorçalayıcı organlarnıñ hadimlerine nisbeten yapılğan cinayetler içün memuriy ve cinaiy cezalar da aynı bu qanunlarğa mensüp.
«Böyle etip, Rusiye Federatsiyasınıñ Memuriy kodeksindeki 19.3 maddesine köre, politsiya hadimi, cinaiy-icra sistema müessisesiniñ arbiyi ya da hadiminiñ içtimaiy tertipni nezaret etüv ve içtimaiy telükesizliknen temin etüv boyunca qanuniy avalesi ya da talabına boysunmağanı içün memuriy para cezası ya da memuriy yaqalanuv olaraq memuriy mesüliet belgilengen», – dep bildirile beyanatta.
Bundan ğayrı, mında Rusiye Federatsiyasınıñ Cinayi kodeksine de esaslanalar, böyle etip, uquq qorçalayıcı organı hadiminiñ ömürine zarar ketirilmesi (RF CK 317 madde), akimiyet vekiline nisbeten zorbalıq (RF CK 318 madde), em de akimiyet temsilcisine qarşı aqaret sözleri içün (RF CK 319 madde) mesülietke çeke bileler. Qayd etilgen cinayetler ciddiy bir ceza almasını belgiley.
