Avropa Şurasınıñ yerli ve regional akimiyetler kongressi Rusiyeniñ Qırım ve Aqyarğa nisbeten etilgen areketlerini takbih etti.
Ukraina çetel işler Nazirliginiñ bergen malümatlarına köre, böyle deklaratsiya Kongressniñ 26-ncı sessiyasında qabul olundı. Kongress devamında Ukraina vaziyeti boyunca muzakereler keçirildi.
«Kongress Rusiye areketlerini «Qırım ve Aqyarnıñ rus anneksiyası» olaraq tanıdı ve Ukraina yañı qanuniy akimiyetine destegini bildirdi. Hususan, oña demokratiya quvetlendirüvinde, Ukraina vatandaşlarınıñ ve milliy azlıqlarınıñ aqlarınıñ qorçalanuvında, bütün siyasiy küçleri arasında konstruktiv dialogınıñ temin etilüvinde qol tuta», – dep aytıla beyanatta.
Kongress azaları – bütün Avropa münitsipal ve regional organlarınıñ temsilcileri – Qırım ve Aqyarda keçirilgen "referendum" yalıñız ukrain ve halqara qanunlarına ters kelmedi de, asılında saylavlarğa kelişken minimal demokratik garantiyalarına boysunmadan keçkenini qayd ettiler.
«Böyleliknen, Avropada yerli demokratiyanıñ ilerüvi ve Avropa meydanında yerli saylavlarınıñ ekspert ozğaruvı boyunca mesülietli olğan Avropa Şurasınıñ organı şu referendumnıñ qanunlı olğanını isbatlamaq içün ve Rusiyenen Ukraina arasında sıñrlarınıñ tekrar baqıp çıqmaq içün qullanıla bilecek fırsatlarğa yol bermeycek», –dep işandıralar Ukrain MİDde.
