Link açıqlığı

Ukraina havfsızlıq hızmeti Qırımnıñ qanunsız alda tayin etilgen prokurorı Nataliya Poklonskayanı qıdıra. Bu aqqında malümat İçki işler nazirliginiñ saytında mevcut, dep bildire BBC-Ukraina.

Bundan ğayrı, Ukraina havfsızlıq hızmetiniñ taqiqat bölügi Qırım nazirler şurası tarafından qanunsız alda tayinlengen fevqulâde vaziyetler naziri Serğiy Şahov, Devlet sıñır hızmeti idare yolbaçısı Viktor Melniçenko, içki işler idaresiniñ yolbaşçısı Serğiy Abisov ve Havfsızlıq hızmetiniñ yolbaşçısı Petro Zimanı qıdıra.

Olarnı Cinaiy kodeksniñ 109-ıncı maddesiniñ 1 bapı boyunca cinayette (anayasa qurumını devirmek ya da deñiştirmek ve devlet akimiyetini zapt etüv areketleri) şekleyler.

Şeklengen şahıslar martnıñ 13-den berli qıdıruvda buluna.

Bundan evel Kiyev memuriy mahkemesi Qırım Yuqarı Radasınıñ devlet memuriyetlerini muhtariyet reberligine boysundıruv, Adalet nazirligi, İçki işler nazirligi, bergi hızmeti ve diger organlarnı meydanğa ketirüv aqqında qararını lâğu etti.

XS
SM
MD
LG