Link açıqlığı

«Qırım Cumhuriyet Devlet şurası» dep adlanğan qanunsız Qırım parlamentiniñ başı Volodımır Konstantinov yarımadada yaşayışınıñ bütün saaları boyunca keçici müddetiniñ plannı azırlaycaq teşkiliy gruppanı meydanğa ketirmege avale etti.

Bunı müessiseniñ press-hızmetinde bildireler.

Olğan malümatqa köre, böyle plan yaqın künleri azırlanmaq kerek.

Volodımır Konstantinov al-azırda Qırımda Rusiye Federatsiyasınıñ prezidenti Volodımır Putinniñ yarımadada Rusiye federal akimiyet organlarınıñ teşkilâtlandıruvı aqqında berilgen avalesi amelge keçirgenini hatırlattı.

Federal organlarınıñ çoqusı endi teşkil olundı, eki aftadan soñ bu iş soñuna yeter.

«Bizim esas vazifemiz, akimiyetiniñ, deputatlarınıñ, nazirler Şurası azalarınıñ esas vazifesi – Qırım Cumhuriyetiniñ sakinleri iç bir qolaysızlıqnen rastkelmesin dep, şimdiki keçici zamannı eñ yüksek seviyede keçirmekten ibarettir».

Bundan da ğayrı, «spiker» qabarcılıqsız yañı Qırımnı qurmağa vade etti.

«Biz yap-yañı Qrım Cumhuriyetini qurmaq kerekmiz. Bunı yapmaq içün unikal fırsatımız bar. Yañı Cumhuriyet qabarcılıq ve bürokratiyadan temizlenmek kerek. Bu bizim strategik yolumız ve printsipial mevamızdır. Qabarcılqnen bağlı olğan adiseler Qırımdan yoq etilecek», – işandıra Volodımır Konstantinov.

Malüm olğanı kibi, Ukraina Yuqarı Şurası Qırım parlamentiniñ dağıtıluvı aqqında qararnı taa martnıñ ortasında aldı.

XS
SM
MD
LG