Link açıqlığı

Saatnıñ esas haberi

Ukraina askerleriniñ qorantaları işğal şaraitlerde nasıl yaşaylar


Aqmescit – İşaretleri olmağan bellisiz silâlı adamlarnıñ areketlerini kütleviy haber vastaları nezaret etti, arbiy bölükler ve diger strategik obyektlerniñ ücümi – matbuat vastalarınıñ nezareti altında oldı. Qırımda bulunğan Ukraina arbiylerini bütün memleket közete. Lâkin yarımadada olacaq deñişmelerni qorqqan, gecelernen yuqlamağan, arbiy bölüklerge kirip olamağanlar perde artında qalalar. Bu – hızmet yerlerinde zapt etilip qalğan, bellisiz «yeşil adamçıqlarnıñ» nişanı olğanlarnıñ qorantalarıdır.

Ukraina askerleri arbiy bölükni terk etip olamay, qışlada yuqlay ve aşaylar, bazıda aşhane yemeklerini aşamağa mecburlar, lâkin bu da olarnı raatsızlamay. Olarnıñ eñ büyük qaseveti – olar içün er daim qayğırğan ve evde qalğan apayları ve balalarıdır.

Taktik aviatsiya brigadasınıñ komandanı polkovnik Yuliy Mamçurnıñ apayı Larisa işğalniñ birinci künlerinden başlap A–4515 arbiy bölüginiñ araba qapularını terk etmey. Qızı ve torunını olar birden qartanasına yollağanlar. Aqayı olarnen beraber ketmege ne qadar yalvarsa da, o, qalmağa qarar berdi. «Men ve menim apayım – bölükni terk etecek soñki insanlardır». Yuliy Mamçurnıñ bir çoq intervyülerinden birini seyir etkenler onıñ bu sözlerini eşitkendirler. Demek ki, olar Qırımnı terk etmeycekler.

Larisanıñ aytqanına köre, o, gecelernen nezaret-kiriş noqtasınıñ araba qapuları ögünde bir özü turmay. Onıñ kibi qadınlar pek çoq. «Şimdi, yazıq ki, olar mında degiller. Olar raatlanmağa, biraz yuqlamağa ketkenler», – dep ayttı Larisa. Men ise bu daqqaları anda-mında baqıp, subetleşmege azır olğan qadınlarnı qıdırmağa başladım.

Er kes, ukrain arbiyleri de, arbiy bölüklerden tış qalğanlar da, pek qasevetleneler. Belbek askerleri arbiyler tarafından ücüm etilecek, dep qorqmaylar, olar yerli samooborona ücüm ete bile, dep raatsızlanalar. Onıñ Rusiyege qol tutqan vekilleri özüni pek sert alıp barmaları mümkün ve bunıñ kibi vaziyette çeşit türlü provokatsiyalar olması mümkün. A–4515 arbiy bölügi aqqında yañlış malümat tarqatılmasın dep, canlı yayın teşkil etildi.

Arbiylerniñ qorantaları aqayları içün pek qayğıra. «Donbass» idare gemicisiniñ apayı İrina gemi askerlerine qol tutuv aktsiyasını teşkil etmege qarar aldı. Onıñnen beraber nezaret-kiriş noqtasınıñ araba qapusı yanında işğal etilgen askerlerniñ apayları ve soy-sopları toplaştı. «Donbass» idare gemisiniñ erkânı bayağı qasevetlendi. Olar Rusiye arbiyleri tarafından yapılğan granatalar ücümine oğradılar.

Deñizciler soñuna qadar sabır ettiler

İrina aqayını bir qaç aftadan berli körmey. Şimdi o, niayet, evde. Lâkin ileride ne olacaq – iç bir kimse tasavvur etip olamay. «Donbass» idare gemisi üzerinde Rusiye bayrağını ukrain deñizcileri kötermedi, lâkin bunı bilgenler pek az. O daqqaları gemide başqa adamlar bulunğan edi. İrinanıñ aqayı ant sözlerinden vazgeymecek ve olar başqa şeerge köçmege azırlar.
İrina
İrina
«Men Aqyarlım, amma mında qalıp, yaşamağa istemeyim. Menim balalarım mında büyügenlerini istemeyim. Er şey deñişti. Tanışlarım – telefon açıp, qol tutmağa tırıştılar, dostlarımnıñ çoqusı ise şeref ve menlik ne olğanının bilmey ekenler. Aqayım başqa devlet tarafına keçse, özüne küzgüde baqıp olamaycaq», – tarif ete İrina. Onıñ aytqanına köre, «Donbass» gemisiniñ aman-aman bütün erkânı aynı fikirde.

Arbiyler qorantalarınıñ daa ziyade malümatı ve duyğularını Aqyar şeer Şurasında Aleksey Çalıy ile körüşüvde körmek mümkün edi. Bazı qadınlarnen laf etip, işğal levhaları daa da qorqunç köründi. Berilgen malümatqa köre, bazı arbiy bölükler blok etilgen soñ, qadınlar aqaylarına ne yemek, ne başqa bir şey berip oldılar. Balıqlava sıñırcıları bayağı çekiştiler, gece olar gemilerni Odessağa avuştırdılar. Başqa şeerde para ve vesiqasız bulunıp, olar evge qaytmaq imkânından marum qaldılar.

Bugünki künde duyğular o qadar kederli degil. Başta arbiy bölükler yanında silâlı adamlar er kesni qorquza edi. Arbiylerniñ qorantaları neler tek tüşünmedi. Olarnıñ közleri ögünde kerçek bir cenk levhaları bar edi.

Al-azırda Ukraina askerleri ilerideki areketler aqqında tüşüneler. Tezden nefaqağa çıqacaqlar hızmetini Ukrainada devam etecek olalar. Böyle fikir soñki vaqıtları eñ populâr oldı. Bazıları adiy bir iş qıdırıp başladı. Qayd etmeli ki, Rusiyege hızmet etecekler o qadar çoq da degil.
XS
SM
MD
LG