Ukrainanıñ «Muhalifet bloku» halq deputatı Nestor Şufriç ömür arqadaşınen beraber «Qırımğa romantik seyaat kerçekleştirdiler». Bu aqta Şufriçniñ matbuat hızmeti mayısnıñ 6-nda Facebookta bildire.
Halq deputatınıñ bildirgenine köre, ilhaq etilgen Qırımğa mayıs bayramlarına ketti. Şufriçler Yaltağa barıp, «tatilniñ birinci qısmını anda keçirdi».
«Çonğardan keçtik. Bizim tarafımıznı bir tarafqa 15 daqqa içinde, keri qaytqanda 12 daqqa içinde keçtik. Ekinci tarafta (Rusiye FSBsi kontrol etken – QA) üç buçuq ve eki saat bekledik», – dep aytıla haberde.
Şufriç ziyaretini izaatlap, «Qırımda keçirgen üç künü içinde yüregi çoq sızladı», dep bildirdi.
«Anam, babam ve ağamnen balalıq ve gençlik künlerim mında keçken edi! Yaltada insanlar tanıp, külümsirey ve selâmlaşa ediler. İnsanlarnıñ bayram keyfi bar, amma bazılarınıñ közlerinde keder de körüne. Evge qaytqanda da yaqıt stantsiyasında ve qavehanede tanıy ediler – kelip laf ete, Zelenskıynıñ ğalebesi ile hayırlay edi, Poroşenkonıñ zamanı bitkenine quvana ediler!», – dep bildire Şufriçniñ aytqanlarını matbuat hızmeti.
Qayd etilgeni kibi, «Nestor İvanoviç ve ömür arqadaşı BİZİM QIRIMĞA daa bir kere qaytmaq içün deñizge ğrıvnâ atqanlar».
Yerli sakinler Şufriçni körgenlerini Qırım.Aqiqatqa tasdıqladı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
