Şri Lanka polisi, aprelniñ 21-inde olğan patlavlarnı teşkil etkeninde esas şübeli sayılğan eki adamnı tutıp, tevqif etti. Yerli matbuatnıñ malümatına köre, yaqalanğanlar - ağa-qardaş. Olarnıñ adları - Mohammad Sadıq Abdül-Haq ve Mohammad Şahid Abdül-Haq.
Ve daa polis, ağa-qardaş patlav künü yürgen furgonnıñ aydavcısını tutıp aldı. Bundan ğayrı, furgon turğan evniñ saipleri ve sübeliler saqlanğan ayaqqap tükânınıñ saibi yaqalandı.
Terror eylemi davası boyunca umumen 100-den çoq adam yaqalandı, olarnıñ arasında Suriye ve Mısırdan kelgenler bar. Daa üç şübeli, polis eki kün evel yapqan ücümi vaqtında elâk etti. Reuters agentliginiñ malümatına köre, olar içtimaiy ağlarda kâfirlerge qarşı büyük cenkni başlamaq çağıruvlarınen videolarda bar edi.
Aprelniñ 21-inde Şri Lankada sekiz patlav oldı, şu cümleden hristian kilselerinde ve paalı musafirhanelerde. 250-ge yaqın insan elâk oldı, cesetlerni aynılamaq qıyın olğanı içün, dos-doğru raqamlar daa yoq. Ücümler içün mesuliyetlikni özüne “İslâm Devleti” terroristik gruppası aldı.
