Şri Lanka prezidenti Maitripala Sirisena aprelniñ 21-nde eñ azından 290 insan elâk olğan ve beş yüz kişi yaralanğan patlavlardan soñ fevqulâde vaziyetni ilân etmege planlaştıra, dep bildire Azatlıq Radiosı.
Fevqulâde vaziyet gece çalışıp başlaycaq ve politsiya ve arbiylerge şübheli insanlarnı mahkeme qararı olmasa da yaqalamağa ve sorğuğa çekmege imkân berecek.
Prezidentniñ ofisi haber etkenine köre, o, ücüm etkenlerniñ çetel bağlarını taqip etmek içün halqara yardım isteycek.
«İstihbarat maruzalarına köre, yerli terroristlerniñ arqasında çetel terrorist teşkilâtları tura. Şu sebepten prezident diger memleketlerden yardım isteycek», – dep aytıla haberde.
Şimdilik aprelniñ 21-nde patlav mesüliyetini öz boynuna alğanlar yoq. Amma Şri Lanka ükümeti tünevin yüz bergen patlavlardan «Camaat at-Tauhit» yerli radikal islâm gruppası mesüliyetli, dep bildirdi.
Bundan ğayrı, ükümet politsiya kilselerge yapıla bilecek ücümler aqqında bilip, olarnıñ ögüni alamadı, dep bildirdi.
Politsiyanıñ daa evel haber etkenine köre, Şri Lankadaki patlavlarğa alâqası bar olğanından şübheli sayılğan 24 insan yaqalandı.
Ükümetniñ fikirince, üç kilse ve üç musafirhanege canlı bombalar ücüm etti.
On yıl evelsi mında vatandaş cenki bitken soñ bu ücüm adada kerçekleştirilgen eñ büyük zorbalıq oldı, dep aytalar.
Politsiyanıñ malümatına köre, elâk olğanlar arasında – 35 çetel vatandaşı, ABD, Büyük Britaniya, Qıtay, Felemenk, Portugaliya vatandaşları.
