Şri Lanka akimiyeti yuzni qapatqan urbanı kiymege yasaq etti. Azatlıq Radiosınıñ bildirgenine köre, bu yasaq 250 insannıñ ölümine sebep olğan patlavlardan soñ kirsetildi.
Qanun aprelniñ 29-nda işke tüşürile. Qarar ükümetniñ teklifinen qabul etildi. Baş nazir Ranil Vikremesingniñ tevsiyesinen sıñır tedbirleri islâm din adamlarınen mesleatlar içün qaldırılğan edi.
Şri Lanka politsiyası aprelniñ 21-nde katolik Pashanıñ qayd etilüvi vaqtında yüz bergen patlavlarnı teşkil etüvden şübheli sayılğan eki insannı yaqalap apiske aldı. Yerli kütleviy haber vastalarınıñ bildirgenine köre, yaqalanğanlar ağa-qardaş ola. Olarnıñ adları – Mohammad Sadik Abdul-Hak ve Mohammad Şahid Abdul-Hak.
Aprelniñ 21-nde Şri-Lankada patlavlar oldı. Canlı bombalar Pasha qayd etilgen bir qaç kilsege ve çetel turistleri qalğan musafirhanelerge ücüm etti. «İslâm devleti» terror teşkilâtı mesüliyetni öz boynuna aldı.
