Nazirler şurası Ukrainanıñ karantinden çıquv planını aydınlattı, o, beş etaptan ibaret olacaq, dep haber etti baş nazir Denıs Şmığal, dep haber ete Azatlıq Radiosı.
Onıñ aytqanına köre, «yahşı epidemiologik vaziyet olsa, bu plannı yerine ketirüvniñ ilk noqtası mayısnıñ 11-nde ola bile».
«Er bir etapnıñ belli indikatorları bar ve hastalıq tarqaluvınıñ dinamikasına bağlı. Ükümetniñ karantinden çıquv yol haritası ukrainalılarnıñ ayatlarını saqlap qalmağa ve aynı vaqıtta iqtisadiy istiqrarnı ğayrıdan tiklemege imkân berecek», – dep bildire ükümet reisi.
Teklif etilgen plannıñ tam vaqıt kriteriyleri yoq.
Martnıñ 12-nde Ukrainada koronavirus yuqunçı qırğınlığı sebebinden ve onıñ tarqaluvına yol bermemek içün oquv yurtlarında karantin başlandı. Martnıñ 17-nden berli eglence ve cemaat aşağan yerleriniñ (aş çıqarılğan yerler istisna ola) işi yasaqlana, naqliyat areketi sıñırlana. Azıq malları, turmuş malları tükânları ve aphaneler çalışa.
Karantin aprelniñ 3-ne qadar devam etecek edi, amma ükümet onı daa üç aftağa – aprelniñ 24-ne qadar uzatqan edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
