Sentâbrniñ 30-nda Sudaq civarındaki Taraqtaş (Daçnoye) köyünde köydeşler körüşüvi oldı. Bayramğa yerli sakinlernen beraber mında doğğanlar ve olarnıñ bala-torunları keldi.
«Er yıl Taraqtaşnıñ köydeşler körüşüvine bütün Qırımdan insanlar kele. Olarnıñ ecdatları mında doğdı. XXI asırda er kes telefonda subetleşe, amma Taraqtaşqa baqıp, keçmişte qalğan künlerni hatırlamaq, laf etmek – bam-başqa bir şey. Sudaqlılar ve bu yerlerniñ sakinleri pek faal insanlar, olarnıñ tabiatı başqalarğa oşamay, mındakiler qırımtatar halqınıñ yaşayışında er vaqıt müim rol oynay edi», – dep bildirdi bayram teşkilâtçılarından biri Edem İsmailov Qırım.Aqiqatqa.
Taraqtaş köyü güzel manzaralı bir yerde yerleşe. Köyniñ ögünde Qara deñiz olsa, arqasında Taraqtaş dağı qala. Onıñ qayaları balaban bir taraqqa oşay. Sağda – Baqa Taş. Solda – Aybatlı ormansız bayırı.
Köyniñ meraqlı ikâyesi de bar.
«Rusiyeliler Qırımğa endi-endi kelmege başlağanda mında İgumen Parfeniy keldi. O, merametli ve ikmetli olıp, yerli sakinlerniñ sayğısını qazanğan edi. Taraqtaşlı Seydamet onıñ dostu oldı. Vaqıt keçti, İgumen Parfeniy ğayıp oldı. Ne qadar qıdırsalar, faydası olmadı. Taqiqat ne bir delil, ne de ğayıp olğannıñ cesedini tapamayıp, dostu Seydamet ve daa eki qırımtatarını öldürüvde qabaatladı. Üçü de idam etildi. Vaqıt keçkeninen belli ola ki, İgumen Parfeniy kilse reberliginen qavğalaşıp, Amerikağa ketti. Bunı köy tarihında Taraqtaş faciası dep adlandırdılar. Seydametniñ sürgünlikten qaytqan torunı eykeltraş İlmi Ametov 1998 senesi köyde idam etilgenlerniñ abidesini tikledi», – dep ayta bayramğa kelgen Qırım aq qorçalayıcısı Abdureşit Cepparov.
Bayram köy yanındaki meydanda keçirildi. Göñülliler köydeşleri içün pilâv, qartoplı et, ötmek pişirdi. Mında sofralar donatıldı.
Tedbir başında qırımtatar faali İlver Ametov köydeşleriniñ ögünde çıqışta bulundı:
Eskiden daa çoq adam kele edi. Şimdi o qadar quvanç yoqİlver Ametov
«Köydeşler körüşüvine çaresi olğan er kes keldi. Er yıl körüşemiz. Biri-birimizni körgenimizge quvanamız. Daa ne aytayım… Eskiden daa çoq adam kele edi. Şimdi o qadar quvanç yoq, insanlarnıñ keyfi yoq, amma ümüt etem ki, bu çoq sürmez».
Teşkilâtçılar muzıkalı programmanı azırladı. Bayramda olğan sanatkârlar arasında yırcı, bestekâr, oca, Qırımda nam qazanğan artist, Ukrainada nam qazanğan sanat erbabı, halqara yarış ve festivallerniñ laureatı Uryane Kenjikayeva bar edi. Yırcı Taraqtaşlılarnı hayırlap, bir qaç türkü ayttı.
Bayramnıñ soñunda köydeşler Taraqtaş tarihınıñ daa bir parçası olğan fotoresim yaptı.
