Kyivde Rusiye elçiligi yanında aprelniñ 25-inde “Şiddetli rejim tatili: kurort, qaysında adam hırsızlaylar” aktsiyası keçirildi. Qırım.Aqiqat mühbiri bildirgeni kibi, bu 34-ünci er aylıq aktsiya, onda “Crimea SOS” cemiyet teşebbüsiniñ faalleri, ilhaq etilgen Qırımda hırsızlanğan adamlarnıñ meselelerini tahqiq etmege Rusiyeden talap ete.
Aktsiya vaqtında faaller Rusiye elçiligi kirişinde, rusiye quvetçileri turğan timsaliy memuriy sıñırnı qurdı. Faaller, pasport nezaretini keçip turğan turistler sıfatında edi. Bir qaç teşkerüvden soñ bir “turistnı” tutıp aldılar ve bilinmegen yerge alıp kettiler.
“Bu performansnen biz, er adam zorlama yoq oluvnıñ qurbanı ola bilgenini köstermek istedik”, - dep aytıp berdi “KrımSOS” cemiyet teşebbüsiniñ koordinatorı Tamila Taşeva.
Faallerniñ malümatına köre, Qırımnıñ ilhaqından berli 44 qırımlı ğayıp oldı.
