Qırımnıñ şimalinde Rusiye arbiy tehnikası avuşmaqta, dep bildire dekabrniñ 20-nde şaatlar. Qırım.Aqiqat mühbiri haber etkenine köre, Ermeni Bazar tarafından memuriy sıñırğa taba zırhlı taşıyıcılar, toplar ve tarla aşhanesi kolonnaları kete.
Berilgen malümatqa köre, kolonnalardan biri «Krımskiy titan» zavodı civarlarında, yoldan bir qaç kilometr mesafesinde yerleşti.
Ukraina Devlet sıñır hızmeti yolbaşçısınıñ yardımcısı Oleg Slobodân Qırım.Aqiqatqa bildirdi ki, sıñırcılar vaziyetni közete.
«Vaziyetni közetemiz, dep tasdıqlay bilem. Amma şimdilik izaatlap olamayıq, çünki bütün malümat umumiyleştirile ve areket planı çerçivesinde qullanıla», – dedi Slobodân.
Ukraina Mudafaa nazirligi vaziyetni izaatlamayıp, muracaat yollamağa teklif etti.
Ukraina prezidenti Petro Poroşenko bildirdi ki, avgust ayınıñ soñundan başlap Rusiye Ukraina sıñırı boyunca askerlerniñ bulunmasını quvetleştirdi. Onıñ qayd etkenine köre, Qırımda ve Donbasnıñ işğal etilgen topraqlarında Rusiye arbiy tehnikasınıñ sayısı artqanı qayd etildi.
«Ukraina sıñırı boyunca Rusiye ordusınıñ yerdeki taqımları Donbasnıñ vaqtınca işğal etilgen topraqlarında ve Qırımda 28 taktik gruppa batalyonı, 1120 tank, 2600 zırhlı maşina, 1230 topçı sistema ve 442 raketa sisteması, 6 operativ-taktik raketa kompleksinden ibarettir», – dep yazdı Poroşenko.
2018 senesi noyabrniñ soñunda Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
