Şçölkino Qırım şeerinde, doquz qatlı evniñ damında patlav ve yanğın yüz berdi dep bildire Rusiyeniñ FVN-nin Qırım idaresi.
“Alınğan malümatqa köre, dam tamiri vaqtında 2 gaz balonı patladı. Fevqulade adise yerine yanğıncı-qurtarıcı hızmetler ve başqa acele hızmetler yollanıldı”, - denile beyanatta.
Qurtarıcılarnıñ aytqanına köre, elâk olğanlar ve yaralanğanlar yoq, ev dağılması ve dam bozulmasınıñ telükesi yoq.
Matbuat, patlavdan soñ 12 kvadrat metrlik yanğın çıqqanını bildirdi.
Şçölkino sakinleri vaqia süretlerini içtimaiy ağlarda derc ete. Olarnıñ bildirgenine köre, adise Donetskaya soqağındaki çoq qatlı binada olıp keçti.
Şçölkinodaki nice qatlı evlerniñ sakinleri, olarnıñ kvartira ve kirişlerinde tavandan suv aqqanını bildirde,dep bir kün evel “Vesti Krıma” haber etti. Matbuatqa köre, şeer ve rayon memuriyetine suv batuvlar aqqında 60-dan çoq muracaatlar berilgen.
