Link açıqlığı

Saatnıñ esas haberi

Ğeraşçenko Zelenskıy ile körüşüv aqqında: Rada mayısnıñ 14-nde inauguratsiya kününe rey berecek


İrına Ğeraşçenko
İrına Ğeraşçenko

Ukraina Yuqarı Radası mayısnıñ 14-nde Ukraina prezidenti saylanğan Volodımır Zelenskıynıñ inauguratsiya kününe rey berecek. Tantanalı vaqia keçirilecek künü daa belgilenmedi. Bu aqta Yuqarı Rada reisiniñ birinci muavini İrına Ğeraşçenko Zelenskıynıñ parlament ve deputat fraktsiyalarınıñ liderleri ile körüşüvini izaatlap, Facebook saifesinde bildirdi.

«Yañı saylanğan prezident (Zelenskıy – QA) inauguratsiyanı mayısnıñ 19-nda keçirmege teklif etti. Körüşüvde olğan fraktsiya reberleriniñ çoqusı bu teklifni zenaatdaşlarına bildirecekler, dep ayttı, qarar ise mayısnıñ 13-14-nde fraktsiyalarnıñ toplaşuvlarında qabul etilecek», – dep yazdı Ğeraşçenko.

Onıñ aytqanına köre, mayısnıñ 14-nde Rada «inauguratsiyanıñ resmiy künü belgilenecek qararğa tez rey berir».

«Tam bir künni daa aytıp olamayım, onı parlament belgilemeli, rey bermeli. Er şey qanunğa uyğun bir şekilde ve qanun belgilegen müddet içinde yapılacaq. Umumen körüşüv konstruktiv oldı», – dep qoştı Ğeraşçenko.

Zelenskıy Radada keçirilgen körüşüvden soñ jurnalistlerge şöyle dedi: «Farqlı künlerni muzakere ettik, amma fraktsiya liderleriniñ farqlı fikirleri bar. Şu sebepten künni mayısnıñ 14-nde Yuqarı Rada toplaşuvında añlaycaqmız. Olar bizim künümizge rey berecekler, anda baqarmız». Bu aqta «Ukraina haberleri» haber agentligi bildire.

Yuqarı Radada Ukraina prezidenti inauguratsiyasınıñ 2019 senesi mayısnıñ 19-nda ötkerilmesine dair teklif qayd etildi. İnauguratsiya resmiy neticeler ilân etilgen künden 30 kün içinde, yani iyünniñ 3-ne qadar, ötkerilmeli. Prezident Yuqarı Radanıñ tantanalı toplaşuvında Ukraina halqına ant etmeli.

XS
SM
MD
LG