Ukraina halq deputatı, «Yevropeyska solidarnist» fraktsiyasınıñ reislerinden biri İrına Ğeraşçenko Ukraina Yuqarı Radasını Qırımda keçirilecek Rusiye saylavlarınıñ neticelerini tanımamasına çağırdı. Bu aqta o, sentâbrniñ 3-nde Ukraina parlamentinde çıqışta bulunıp ayttı.
«Sentâbrniñ 8-nde Qırımda işğalciler tarafından qanunsız yerli saylavlarnıñ keçirilmesi olamaz, ve «Yevropeyska solidarnist» parlamentni olarnıñ neticelerini tanımamasına çağıra. Bu salonnıñ bütün taraflarını birleştirgen bir mevzu bar – Qırım ve Donbasnıñ qaytarıluvı, mında eki fikir olamaz. Em «Yevropeyska solidarnist», em bütün parlament adından Ukraina bu saylavlarnıñ neticelerini iç bir vaqıt tanımaycaq, dep ayta bilemiz, mence», – dedi parlament azası.
Onıñ qayd etkenine köre, Ukraina topraq bütünliginiñ ğayrıdan tiklenüvi devlet siyasetiniñ esas prioriteti ola.
«Rusiyeden Qırım ve Donbasnı acele qaytarmasını talap etemiz ve işğalden qurtaruv içün küreşecekmiz. Qırım ve Donbasnı qaytarmaq içün memleket içinde birlik ve eki temel kerek: küçlü iqtisadiyat ve küçlü demokratiya», – dep qayd etti İrına Ğeraşçenko.
Rusiye akimiyeti 2019 senesi sentâbrniñ 8-nde Qırım ve Aqyarda Qırım parlamenti ve yerli şura deputatlarınıñ saylavlarını keçirmege planlaştıra. Ukraina, ABD, AB ve bir sıra dünya memleketi işğal altındaki yarımadada Rusiye tarafından saylavlarnıñ keçirilmesini qanunsız tanıycaq.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
