«Avropa birdemligi» firqasından halq deputatı İrına Ğeraşçenkonıñ sentâbrniñ 14-ünde bildirgenine köre, Kremlniñ sabıq siyasiy mabüsi, qırımlı Volodımır Baluhnıñ alı ağır qala.
O, ekimlerniñ aytqanına köre, olacaq tedaviyleme içün tamam şimdi müim zaman başlana dep ayttı.
"Alı stabil ağır. Hasta ve bizim içün 7-10-uncı künler pek müimdir. Patsiyent er şeynen temin etildi, kerekli er şeyni yapamız", - yazdı Ğeraşçenko Facebookta.
Onıñ bildirgenine köre, Volodımır Baluhnıñ alı aqqında ekimlernen qoşma mesleatlar keçirildi. Oña ameliyat yapıldı ve reanimatsiyağa alğanlar. Daa soñra Baluh aqcigerlerni suniy avalandıruv cihazına bağlandı. Onıñ ağır qafa-miy yarası bar.
Baluh köteklengenini Oleg Sentsov haber etti. Onıñ malümatına köre, faal sentâbrniñ 7-nden 8-ne keçer gecesi köteklendi. Ağır alda hastahanege alındı – qolu ve köpürçik kemigi sındırıldı.
Kiyv politsiyasınıñ malümatına köre, qırımlı 10-15 kişinen «Gidroparktaki» qavelerden birinde raatlanğan edi. Soñki sefer onı yarı gecede körgenler. Uquq qoruyıcılar Ukraina Ceza kodeksiniñ 187-inci maddesiniñ 4-ünci qısmına istinaden (aydutlıq) cinaiy tahqiqat başlattı.
Ukraina prezidentiniñ ofisi qırımlığa yapılğan ücüm sebebinden qasevetlengenini bildirdi.
