Ukrayina Mudafaa naziri Oleksiy Reznikov CNN -ge ğarp silâsı Ukrayinağa Qırım ve Donbasnı işğalden azat etmege yardım eyetcegini bildirdi.
"Biz bütün topraqlarımıznı, bütün, şu cümleden Qırım ve Donbasnı da azat etecekmiz. Qırım Ukrayinanıñ strategik maqsadıdır, çünki bu Ukrayina toprağıdır, amma biz adım-adım areket etecekmiz", - dedi Reznikov.
Onıñ sözlerine köre, Ukrayina topraqlarınıñ işğalden azat etilüvi üç basamaqtan ibaret olacaq:
- daa ğayıplarımız olması içün yerlerde vaziyetniñ turğunlaştırıluvı,
- Rusiye ordusını 2022 senesi fevralniñ 24-ne qadar olğan sıñır tışına sıqıştırıp çıqaruv,
- ğarp tarafdarlarımız ile Qırım ve diger topraqlarımıznıñ "qaytarıluvınıñ eñ yahşı yolu" ile bağı aytışuvlar.
Aynı zamanda Reznikov dedi ki, Rusiyeniñ Qırımnıñ arbiy yolnen azatt etilmesine mümkün reaktsiyası "emiyetsiz olacaq".
"Çünki olar bunı Hersonda, Zaporijjâda, Mariupolde körecekler... çünki bu Ukrayina topraqları, Qırım da iç bir şeyge baqmadan ukrayin toprağıdır", - dedi Reznikov.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
