Ukrayina mudafaa naziri Rustem Ümerov Kıyivniñ NATO azası olmaq içün işğal etilgen topraqlardan vazgeçmek teklifini eşitmedi. Bu aqta o, oktâbrniñ 18-nde Brükselde NATO memleketleriniñ mudafaa nazirleriniñ körüşüvinde Azatlıq Radiosınıñ mühbirine ayttı.
Böyleliknen, o, ortaqlardan böyle tekliflerni eşittimi yoqmı sualine cevap berdi.
"Yoq, men bunı eşitmedim. O olsa edi, men, elbette... pek yaramay şeyler yapar edim", — dep ayttı ukrayin naziri.
Bundan evel kütleviy haber vastalarında Ğarp tarafından Ukrayinağa Şimaliy atlantik alyansına kirmek içün Rusiye tarafından işğal etilgen topraqlardan vazgeçmek teklifleri aqqında haberler peyda oldı. Böyle bir fikirni 2023 senesi avgust ayında NATO baş kâtibi apparatınıñ yolbaşçısı Stian Ensen bildirdirgen edi.
Oktâbrniñ 16-nda Ukrayina prezidenti Volodımır Zelenskıy, Ukrayinanıñ cenkte ğalebe planı beş açıq noqtanı ve bir qaç gizli ilâveni teşkil etkenini qayd etti. Birinci madde — Ukrainanıñ NATO-ğa şartsız davet etilmesidir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
