İşğal etilgen Qırımda ve Aqyarda, Rusiye kontrolindeki yerli akimiyet malümatına köre, aprelniñ 21-nde koronavirus sebebinden üç biñden çoq kişi közetüv altında buluna.
Qırımnıñ Rusiye Sağlıq nazirligi bildirgenine köre, 1368 insan tibbiy közetüv altında buluna, 1248-i evde dinamik közetüv altında qala, 73-ü hastahanede, 47 insan observatorlarğa alındı.
Aqyarda yerli akimiyet yañı koronavirus hastaları yoq, dep bildire. 117 insan yuqunç hastahanesinde közetüv altında buluna, 1524 kişi yaşağan yerinde közetile.
Berilgen malümatqa köre, Svâto-Georgiyevskiy manastırında 21 insan tibbiy közetüv altında qala.
Aqyarda 13 COVID-19 hastası tedaviylenmege devam ete.
Qırımda keçken künü daa bir koronavirus hastası qayd etildi – Qurman rayonında 11 yaşında bala hastalandı. Qırımnıñ Rusiye Sağlıq nazirliginiñ malümatına köre, umumen Qırımda 46 COVID-19 hastası bar, 23-ü hastahaneden çıqarıldı, 23-ü tedaviylenmege devam ete. Aprelniñ 20-ne qadar Aqyarda 18 koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
